Z Chóśebuza/Cottbus. Internetowy portal Serbskego instituta dolnoserbski.de jo wó nowu resursu bogatšy. Wužywarje serbskeje rěcy namakaju tam wjelgin wutwarjony modul k serbskej fonetice Dolnoserbske wugranjanje. We njom su zgromaźone na­drobne informacije k wugranjanju wšyknych serbskich zukow. To wósebne jo: Pósporomje fachowych rozkłaźenjow dajo tam zukowe dataje z pśikładami, źož wužywaŕ móžo wóne zuki we słowach słyšaś. Sobuźěłaśerje Serbskego instituta su wósebnu wažnosć dali zukam a jich kombinacijam a pozicijam, z kótarymiž nimskorěcne luźe maju śěžkosći, kaž měke konsonanty, sycawki abo serbski [r]. Wósebny staw jo pósćony rozdźělam mjazy nimskim a serbskim wugranjanim. A aby wužywaŕ to lěpjej zbadał a wusłyšał, su pódane zukowe dataje za wobej wugronje.

Wažnu rolu grajo we modulu wótwisnosć mjazy pisanim a wugranjanim, a wužywaŕ móžo pytaś „pó zukach“ a „pó pismikach“. Wósebne fonetiske zjawjenja ako palatalizacija, asimilacija abo zgubjenje spiwnosći su wósebje rozkłaźone, a wšomu tomu jo pśidana licba zukowych datajow.