Za woglěd komisije su samo zestajali a dali śišćaś „Dissener Dorfzeitung/Dešański casnik“ z wjele informacijami.

Až jo w Dešnje cesto wjeliki a za wětšy źěl teke wjasoły ruš, to jo znate. Což pak jo se slědny tyźeń srjodu, 3. julija, tam stało, to njejsu Dešanaŕki a Dešanarje hyšći žednje dožywili. Pśipowěźeła ga jo se wětša wósebna komisija z cełeje Nimskeje, ako jo se kśěła wšykno to woglědaś, dla cogo jo było Dešno 2018 ta nejrědnjejša wjas w cełej Bramborskej. A za tym jo kśěła pón gódnośiś, lěc by mógała toś ta dolnołužyska serbska wjas byś teke mjazy tymi nejlěpšymi w cełej Nimskej.