Z Chóśebuza/Cottbus. 20. junija wjacor jo byla zajmna diskusija wó pśichóźe našeje rěcy. W klubowni serbskego internata su powědali w ramiku SMILE-projekta. To jo rěcne slěźenje, kótarež co wuzgóniś šanse za wóžywjenje małych rěcow. Glědajucy na serbske rěcy su se slěźarje rozgranjali z powědarjami tak ako z luźimi, kótarež maju wažny amt, aby mógali wliw wugbaś. Płaśony jo ten projekt Serbskego instituta z pjenjez wót Ameriki. Tamna wjelicka załožba Smithsonian pódpěrujo rěcne slěźenje pla mjeńšynow w europje.

Slěźaŕce prof. Nicole Dołowy-Rybińska a dr. Cordula Ratajczakowa stej wužyłej tu góźbu, aby pśibytnym wokoło 20 pśisłuchrjam doraznje zašćěpili, až jo notnje wugótowaś rěcnu politiku. Z tym měnje, až dej se powšyknje pśemyslowaś a dokradnje rozsuźiś, kótare drogi a kšace su notne, aby serbske rěcy rewitalizěrowali. Comy se w Casniku na to dolnoserbske póśěgowaś.