Idyliski, blisko Mósta měra w Budyšynje, stoj w zagroźe stara, historiska wjaža. Serbska chórgoj, kótaruž wiźiš jano wót Rybakaŕskeje gase, pokazujo, až slězy w zagroźe stoj hyšći jaden chrom. Ten pachany dom jo južo wótwenkach naglědny. Jogo bałki su wótnowjone. Nad źurimi cytam licbje 1764 a 1994 a na źurjach z kridu napisane pismiki C+M+B 2019. Stary dom wobstoj pótakem južor 255 lět a bu 1994 restawrěrowany. Wjele historiskego by mógał nam wulicyś!

„Buźćo wutšobnje witane!“ groni dr. Susanne Hozyna pśijaznje ku mnjo. Tu 57lětnu etnografowku su łoni pówołali za zastupnu direktorku Serbskego instituta w Budyšynje. We pachanem domje nutśi cujoš stawizny starych grědow, a we wjažy z kamjenjanym spódkom duch dawnego casa. Stare murje, bałki a kamjenje zbuźiju fascinaciju. Teke na prědnem nastwaŕku w kuchni a we pódlańskej jspě wótbłyšćuju se stolěta.