Wót źinsajšnego dnja pórucyjo Nowy Casnik swójim lazowarjam nowu słužbu: Nowy Casnik online. Wužywarje interneta na­ma­kaju na internetowych bokach www.nowycasnik.de kompletne aktuelne wudaśa Casnika w elektroniskej wersiji kaž teke połny pśistup do archiwa. Chtož jo grafiskemu wugótowanjeju śišćanego Casnika pśiwucony, ten změjo spódobanje na tak pomjenjonem e-paperu. Lazowaŕ móžo Casnikowe boki w PDF-formaśe pśeběraś a kuždy artikel ekstra nakliknuś. Ten samy buźo se jomu zja­wiś na monitoru nawłos tak, ako jen z papjeranego Casnika znajo. Lazowanje Casnika na smartphonach a tabletach buźo tejerownosći komfortabelnjejše.

Nowe pórucenje njejo dermo. Online-abonement płaśi na lěto 13,20 euro, za wóteběrarje papjeranego Casnika pśidatnje jano 7,80 euro na lěto (kombi-abonement płaśi stakim dogromady 25,80 euro na lěto) . To jo nawłos telik, ako wóteběrarje elektroniskeje wersije Casnika (ako PDF) su dotychměst płaśili. A to jo wjasoła powěsć: to płaśenje njebuźo dla nowego pórucenja pówušone.