Z Groźišća/Grötsch. Domowinske kupki něgajšneje župy Gubin/Baršć organizěruju nadalej zgromadne tšojenja. Sobotu wjacor su pśepšosyli swóje cłonki na šlachtowanje do gmejnskeje wjaže w Groźišću. Tu organizatorisku wócku jo měła we rukach radowiska kupka pód wjednistwom pśedsedaŕki Sieglind Mekleroweje.
To se wě, žywu swinju njejsu na tom dnju zabijali, to pśigótowane měso a jěšnice ga jo jim librowała turnojska flejšaŕnja Verdie. Wušej togo su Halkojc, wobsednikarje małkeje kjarcmy w Groźišću, kulki, kał, górki a wšake druge k pśiběranju gósćam pódawali a to měso a jěšnice nanosyli na blido, źož kuždy jo se sam wobsłužył. Wóń warjonego měsa a jěšnicow jo napołniła luft we zalu, a za krotki cas jo se zestupał dłujcki rěd głodnych luźi, póžedajucych za fryšnym siwnjecym měsom.