Z Gór/Guhrow. Personalne kosty za dešański muzej we wusokosći 45.000 euro by dejała wótněnta dešańska gmejna njasć – nanejmjenjej lětosa a znowa. Głowny wuběrk Bórkojskego amta jo je wušmarnuł ze swójogo etata. Hejgen tak jo Domowinska śpa w Bórkowach pó­trjefjona: teke how su wobzamknuli, až personalne kosty njebuźo wěcej amt njasć – bórkojska gmejna dej je pśewześ.

To wobzamknjenje amtskego etata jo se stało pónjeźele na wobradowanju głownego wuběrka na Górach. Za to jo zgłosował wětšy źěł cłonkow. Dwa zastupnika z Dešna stej zgłosowałej pśeśiwo, a dwa dalšnej stej se głosa zeźaržałej.

We diskusiji jo amtěrujucy wjednik amta Christoph Neumann musał pak pśiwdaś, až amt njesmějo gmejnje pśikazaś, za co dej abo njedej pjenjeze wudaś. To groni: Njebuźo-li dešańska gmejnska rada pśi wobzamknjenju swójogo etata tu źělbu kostow pśewześ, ga buźo amt naslědku musaś je dalej njasć, dokulž jo pśez źěłowe dogrona (Arbeitsverträge) zwězany a wóni ga płaśe dalej – jo wón cłonkam wuběrka gronił. Stakim njejo hyšći wěste, kak ta wěc naslědku wujźo, a to jo cłonkam wuběrka mucało.