Župan Wylem Janhoefer jo we kulturnem źělu rozpšawy pomjenił nowe tšojenja kulturnego žywjenja. K nim słuša rěd „kjarmušny kulturny kafej“, kótaryž su łoni organizěrowali w Ptačecach (Tätzschwitz) za jsy wokoło Złego Komorowa. Kjarmuša chapja se na wjelich městach zasej wótžywjowaś: Serbsku kjarmušu su organizěrowali kupki stareje župy Gubin/Baršć w Barbuce. Znata a lubowana jo serbska kjarmuša w Gołbinje. Teke tradiciske towaristwo ze Žylowka jo wugótowało – kaž kužde druge lěto – drastwinu kjarmušu, a naslědku teke w Běłej Górje a Dešnje su kjarmušowali. Župan jo se źěkował tym, ako to wótžywjenje teje stareje serbskeje tradicije spěchuju.