Z Hochoze/Drachhausen. Nowa sańkowa góra we Krjach (Fuchs-lug), kótaruž gmejna jo dała pśed žednymi lětami nasypaś, dej se wótwózyś abo na druge město pśenjasć. To pomina wót nich Nišy amt za wobzwarnowanje natury w Baršću. Góra lažy zwenka jsy a jo wobškóźeła drogotny biotop a jo wordowała mimo pśizwólenja napórana ‒ pišo jim amt. Gmejna njoco se z tym wótnamakaś: Wóni su na landrota póžedanje stajili a peticiju z pódpismami wjelich Hochozarjow do Baršća pósłali. Amt pak wobstoj na swójom wusuźenju. Šołta Fryco Wojto se góri a źaržy to wobzamknjenje za njerozymne. 40.000 euro buźo to płaśeś, gaž budu musaś tu kopicu zemje wótwózyś.

Ta ceła nastupnosć jo se zachopiła prědk wósymich lět: hochoske jagarje su se zazwólili, až budu wugbaś dobry statk k lěpšemu hochoskeje natury. Wóni su kśěli niźi na łukach wuryś doły a nasajźaś kricki a bomy a napóraś nowy mokšy biotop, ako góźi naturje a źiwinje. Wóni su namakali góźece městko: gmejnski flak we Krjach, pomjenjony Bykowa łuka. Gmejnska rada jo do togo zwóliła, nišy amt za wobwarnowanje natury teke.