Ze Tšupca/Straupitz. Tšupcański młyn rozšyrja swóju śpu za gósći, ten dom młynikarja. Twarske źěła su w połnem źěle. Kšywo, wokna a źěle fasady su južo gótowe. Tuchylu źěłaju elektrikarje. Jadnarka młyna Katrin Doil jo Casnikoju napśeśiwo optimistiska, až mógu k jatšam rozšyrjonu śpu gósćam spśistupniś.

Tšupcański młyn jo južo wjele lět magnet za publikum; zbliska a zdaloka. Tych luźi bywa kužde lěto wěcej a we jśpě młynikarja njejo wěcej město dosegało. Gaž pśiźo ceły bus, njejo tam wěcej městno za dalšnych luźi. To dej se pólěpšyś wót nalěta, gaž twarskim źěłam to wjedro zadoraś njebuźo.

Změju z pśitwarkom ale teke lěpše wuměnjenja za skład, běrow a pśewoblekanje sobuźěłaśerjow.

Gjarda jo jadnarka, až płaśe wšykno ze swójeje kapsy. „By musali źaseś lět cakaś“, jo wótegroniła na pšašanje Casnika, lěc dostanu spěchowańske srědki.

Wót Tšupcańskego młyna žywi se mjaztym 13 kšuśe pśistajonych luźi a styrjo w sezonje pśistajone.