Kšasny lěšćański grod jo gmejna na taki dobry staw spórała. Tam se wjele luźi wóženijo. Stawniki pśidu tam za wěrowanje. Park stoj pód pomnikowym šćitom. 
Mała wjas z wjelikimi pyšnotkami: To jo dobre wopisanje za Lěšće/Hornow. Ta wjas z lěbda wěcej ako 400 wobydlarjami wobstoj z tych źělow Lěšće/Hornow, Lěšće wudwór a Lěšće wutwaŕ.
Ale rownož jich tak mało luźi jo, su wu nas we regionje a teke dalej derje znate. We Lěšćach ga jo Confiserie felicitas, kótaraž jo wumóžyła pó politiskem pśewrośenju 1989 sebjewědobnje teje jsy. Pótom, až jo drustwo rozpadało, njejsu ga nic wěcej měli we tej dosć wótlažanej komunje mjazy Grodkom a Baršćom. Confiserija jo se, ako jo znate, wjelgin derje wuwijała a jo se tak za to starała, až rozpadujuce něgajšne groźe drustwa budu wótryte abo wobnowjone a za nowe wužywanje pśigótowane.
Wósebnje ta nowa kafejownja jo magnet za publikum. Luźe z Lěšćow tam źěłaju, ale na drugi part, jo Casnikoju wulicował wejsny zastojaŕ Thomas Krawc, górje se dla wobchada, kenž teke na kóńcu tyźenja dla felicitas pśez wjas jězdźi.
