Tak wjele luźi prezentěrujo muzeje wót Łužyskeje krajiny muzejow. Zachopjeńk awgusta su se zmakali a zjawnosći swóje projekty za noc muzejow w septemberje pśedstajili. Na tych dogromadu 29 zarědowanjach buźo hyšći wjele wěcej cesnoamtskich luźi wobźělonych. Foto jo nastał w Lěšćach pśed kulisu tamneje kšasneje cerkwje. Foto: I. N. 
Noc muzejow we wokrejsu Sprjewja-Nysa jo južo dobra a rědna tradicija. Wóna buźo lětosa k 14. razoju. Tak ako pla dobrych tradicijow cesto jo, mógu wóni se teke změniś. We toś tej mysli budu lětosa na styrich terminach wótcyniś swóje muzeje.
1. septembra su Drjowk, Dešno, Gubin, Janšojce, Picnjo, Nowa Wjas, Wjeliki Kólsk, Grodk a we Wjelcej w muzeumje wognjoweje wobory na rěźe. Wšuźi budu rědne wjeraški, ale wósebnje comy pokazaś na muzejowy swěźeń w Dešnje. Swěśe swój 35. jubilej z wjele serbskimi wjeraškami. 8. septembra pśedstajiju swóje muzeje w Bórkowach, Hochozy, Chóśebuzu (Lětanišćowy muzej), Klince, Baršću, Rogowje, Zakrjowje, Małem Kólsku a Prožymje. 15. septembra budu zajmne wjeraški w Bóšojcach, Lěšćach, Błobošojcach, Wjelcej (Domowniska śpa) a Zabroźe. A skóńcnje póbitujo 23. septembra w ATZ we Wjelcej wjeźenje pśez dom něgajšneje wognjoweje wobory.
Tema lětosneje nocy muzejow ga jo „Z kamjenja wutśasane – muzeje a jich twarjenja“. Gaž jo móžno, wusměriju se wšykne muzeje ze swójim programom na to.
