Z Chóśebuza/Cottbus. Wósebny stipendium za studenty, kótarež kśě studěrowaś na ceptarske serbsku rěc we kombinaciji z muziku – taku ideju jo zjawił Uwe Kuhlmann, wucabnik Dolnoserbskego gymnaziuma a koordinator za wušy schójźenk, na wobradowanju kubłańskego wuběrka Domowiny pónjeźele tyźeń we wjažy gymnaziuma. Muzika jo wu nich jaden wót dweju bilingualneju fachowu – pódla wucby historije (stawizny) – ak dejtej se wót nowego šulskego lěta wót 10. klase až do abitury we serbskej rěcy wucyś. Aby we pśichoźe jim serbskorěcne ceptarje za muziku njewubrachowali a aby wěste było, až taku wucbu budu móc stawnje pśewjasć, teke gaž jaden ceptaŕ schórjejo, ga za to deje se wše zagronite za casa staraś. To jo nam wulicowała Angela Šurmanowa, wucabnica gymnaziuma a cłonk Serbskeje rady, kótaraž jo tam gromaźe z pśedsedarjom rady Torstenom Makom na wobradowanju pódla była. Brach na serbskich wucabnikach a pedagogach a dobyśe nowych, to jo za jeje suźenim „ten nejwěcej palecy problem“, tak ako w Dolnej, tak teke w Górnej Łužycy.