Z Lubnjowa/Lübbenau. Dwanasćo hobby-fotografow su sobotu pśed dwěma tyźenjoma z fotokamerami łakali pśi tšuze na Theodora Fontanego (1819–1898) , togo znatego pisarja, kótaryž jo z pśewóźarjami se wudał na cołnje do błota.

Peter Becker, fotograf z Raduša, jo pśewjadł za Šulu za dolnoserbsku rěc a kulturu fotografiski workshop. Te fotografy su dejali dokumentěrowaś drogowanje Fontanego pśez Lubnjow. Ten pšawy Fontane, to se wě, jo južo dawno njabogi. Jogo jo tu sobotu dostojnje grał Matthias Greupner, grajaŕ lubnjojskego teatera „Bunte Bühne“. Wóttam stej teke dwě drugej grajarce, kótarež stej se pśewoblakłej pó moźe 19. stolěśa. Na cołnje jo tejerownosći sejźeł jaden pórik z Raduša w serbskej drastwje. Za cołnarja jo jim słužył Wolfgang Gahl z Lěd.

Fotografy su dejali pśi brjoze stojaś a tych wósebnych kněžych tak wótmólowaś, aby žedne znamjenja modernego casa tu historisku bildu njesfalšowali, kaž satelitowe anteny, plastikowe pśikšyśa na cołnach abo elektriske droty. „To jo było śěžko, ale nam jo se to naslědku raźiło“, jo Becker nam gronił.