Ze Žylowa/Sielow. Ropkowane šorce a kóšule – za jadnogo jo to jadnučka rědna a pórědna drastwa, za drugego wuglědaju njeropkowane šorce a kóšule rědnjejše. Take zwaźenje jo pak rědke, dokulaž jo skerjej póstajone, w kótarych jsach ropki standard su a źo njejsu.

Tak płaśi skerjej ako sromota w Janšojcach, Mósće a Radowizy, gaž kóšula abo cańkata šorca njejstej (kradu derje) ropkowanej. Teke Stephanie Lehmannojc jo Casnikoju wulicowała, až pśi njej w Depsku kradu na to glědaju, až na zapusće ma kužde źowćo ropkowanu šorcu. „Smy jadno źowco teke južo dla togo domoj pósłali“, jo groniła Casnikoju něgajšna šefina tamneje młoźiny.