Z Chóśebuza/Cottbus. Zmakanja Pójsynogi z maminorěcnymi luźimi we jsach njebudu se wěcej organizěrowaś ako tšojenje Šule za dolnoserbsku rěc a kulturu. To jo zjawiła wjednica šule Uta Henšelowa na zmakanju wjednikow serbskich institucijow pónjeźele tyźeń w Serbskem domje. Marja Elikowska-Winklerowa, něgajšna wjednica rěcneje šule a iniciatorka tych zmakanjow, jo wobzamknuła, až buźo je pśewjasć wótněnta sama – to jo teke wóna nam na našo pšašanje wobwěściła.

Wina na tom jo njezjadnosć, kak dej pójsynoga we pśichodu źěłaś. Uta Henšelowa jo póžedała wót swójeje pśedchadnice, až dejała zmakanja pójsynogi koncentrěrowaś: nic tak wjele zmakanjow, źož se jano małko luźi wobźělijo, ale wětše zmakanja z wěcej luźimi ze susednych jsow gromaźe. „To ma cyniś z tym, až licba tych zmakanjow jo bejnje pśibrała. We lěśe 2015 smy měli jich 15 k lětu, a lětosa jano we jadnom semesterje 18. We někotarych jsach pśidu pak jano styri luźe. My musymy kuždy raz wjele organizěrowaś – kluce, topjenje w zymjem, plakaty – rownož mamy tuchylu mjenjej personala“, wupšawjujo se Henšelowa.