Kóńc januara su zjawnosći we Grodkojskej radnicy znate cynili, až historiske akty a archiwalije města, ako su se wuměstnili do Lubnjojskeje wótnožki Bramborskego głownego krajnego archiwa, wrośiju se pó 30 lětach do Grodkojskego měsćańskego archiwa. Pó zgromadnem rozsuźenju šołtowki a fachowego wobcerka nutśikowny serwis, až budu historiske akty zasej pśewześ, su w Bergarskem domje pśi marku klimatizěrowane rumnosći wutwarili. Transport z aktami jo był 10. oktobra 2017 z Lubnjowa do Grodka.

Žedne łužyske města, tak teke Grodk, su wót zachopjeńka 70tych lět problemy měli, swóje historiske archiwy pórědnje a wěsće zachowaś. Až do 1972 jo Grodkojski archiw na najśpje radnice lažał, do junija 1982 w twarjenju stareje fabriki a pótom we fabrikantowej wili, kenž jo ale byla wobydlona. W lěśe 1986 jo se město Grodk ze statnym archiwom Pódstupim dogroniło, až budu se akty do Lubnjowa spóraś.