Z Dešna/Dissen. Nowe serbske towaristwo „Serbske koparje/Wendische Auswahl“ pśewjeźo srjodu, 21. měrca, swóju prědnu głownu zgromaźinu, a to w „Serbskem dwórje“ w Dešnje. To jo pśedsedarstwo gromaźe z dalšnymi aktiwnymi cłonkami wobzamknuło, gaž su se 7. februara zmakali w Dešnje. Na tej zgromaźinje kśě slědk glědaś na to, což jo se w towaistwje a kołowokoło njogo dotychměst stało. To nejwažnjejše pśi tom jo, wutwóriś a skšuśiś wubrane mustwo młodych balokoparjow ze serbsko-nimskich jsow Dolneje Łužyce. K tomu mustwoju pśisłuša tuchylu wokoło 25 młoźeńcow z něźi 20 jsow a mustwow, kenž graju za wětšy źěl we wokrejsnej wušej lize a we wokrejsnej lize. W januarje su se „Serbske koparje“ wobźělili na wjelikem turněrje w balokopanju we „Łužyskej hali“. Tam su pokazali, až jo to južo dobre mustwo. Wó tom buźo 21. měrca na pśedwiźonej głownej zgromaźinje to grono a rowno tak wó tom, kak se mustwo pśigótujo na swój woglěd lětosa w juniju do Dańskeje. Tam budu „Serbske koparje“ graś pśeśiwo mustwoju Nimcow z Dańskeje a Friesow a Danow w Nimskej.