Z Dešna/Dissen. Rozpšawa šołty dešańsko-strjažojskeje gmejny Freda Kaisera jo na woklapnicy srjejź januara za wětšy źěł pozitiwnje wupadnuła.

Kaiser jo chwalił pśed tymi jadnab 80 wobydlarjami, až Janojc su pśi Brjazyńskej droze do bydlenjow na pśebytku (Mietwohnung) inwestěrowali, tak až we jsy móžoš něnto lažko bydlenje najmjeś. To jo wjelgin wužytna priwatna inwesticija, dla kótarejež mógu nowe wobydlarje do jsy pśiśěgnuś.

Šołta jo chwalił bórkojski amt, až su bydlenje na Nowakojc dwórje, źož jo wejsna loda Lizka, wjelgin spěšnje wótnowili, tak až te nowe wobsednikarje lody su mógali zawcasa pśed zachopjeńkom sezony do togo domu zaśěgnuś.