Z Janšojc/Jänschwalde Pó motu „Źins jo zapust, zapust – witśe hyšći ceły źeń!“ jo była sobotu, 3. februara, zasej ceła wjas na nogach. Tak su se juž pśed zamaršěrowanim žedne narske luźe gromaźili pśed a w gósćencu „K Lipje“ a cakali z napnětosću na zapustojski pśeśěg.

Psi tom su se wósebnje starše wó jich zapustojskich casach rozgranjali a zawěsće mógali jano to nejlěpše wulicowaś. „To jo było pśecej wjelicna wěc!“ abo „Toś ten cas ja nigdy njezabydnu, wósebnje gaž se na to myslim, kak stej mě wjacor pón tej noze bólełej.“, su někotare pśipomnjeli.

Naraz, zeger 11 jo zazněł prědny spiw wót kapały a 20 pórow su wjasele se smjejucy zamaršerowali. A kak jo młoźina kśěła rejowaś! Wót wšogo zachopjeńka jo było luštnje, publikum jo se zapśěgnuł a rejowanišćo jo było pśecej połne.

Pó pór rundach na parkeśe su pó starej tradiciji pśiwzeli nowych młodostnych do wejsneje młoźiny. Pśiwzeli su se Ebba Briesemannojc, Jenny Markusojc, Jeremy Kretschmar a Emily Neumannojc.

Silva Öhlertojc, šefowka janšojskeje młoźiny jo měła krotke nagrono a pótom jo se pśeśěg zasej zestupał a skóńcnje su směli wen.