Domowinska župa Dolna Łužyca ma wót slědnego tyźenja dalšne towaristwo za nowego cłonka. Jo to towaristwo „Serbske koparje/Wendische Auswahl“, kótarež spěchujo zgromadne mustwo młodych balokoparjow za něźi 15 serbskich jsow we wokrejsu Sprjewja/Nysa a w měsće Chóśebuz. Toś to towaristwo, ako ma južo 42 cłonkow, bu w aprylu togo lěta w Dešnje załožone a cłonki su se ned byli wobjadne, až kśě pśistupiś Domowinskej župje. Rowno tak ako druge serbske towaristwa dostanu teke „Serbske koparje“ dobru pódpěru wót Domowiny. Na pósejźenju župnego pśedsedarstwa jo se towaristwo pśedstajiło cłonkam a gósćam. Župan Wiliam Janhoefer a pśedsedaŕ towaristwa Horst Adam stej pódpisałej dogrono za pśistup k Domowinskej župje.