Wjednik Rěcnego centruma Witaj w Chóśebuzu Viktor Zakar jo w Młyńskej kjarcmje pśi Wjelikej pušćalnicy pśepowdał cesne wopisma a myta Jill-Francis Ketlicojc ze Žylowa a Juliji Schmidtojc z Mósta – pśipóznaśe za jeju wjelicki angažement k lěpšemu serbskeje rěcy. 
Chóśebuz/Cottbus. Rěcny centrum Witaj jo pócesćił młoźinu, kótaraž jo wugbała wósebne statki k lěpšemu serbskeje rěcy a kultury. Te pěśo pócesćone su lětosa pó rědu:
1) Julia Schmidtojc z Móšta – studentka w Lipsku na ceptarske we fachach serbska rěc, špańska rěc a nimska rěc ako druga rěc (za pśidrogowarje). Wóna wucy serbsku rěc, wopóznawa ze serbskeju kulturu teke źiśi imigrantow, pódpěra Rěcny centrum Witaj pśi projektach (mjazy drugim pśi Witaj-campje), źaržy pśednoski, jo drogowała do Pódpołdnjoweje Ameriki a pśirownała kulturu tamnych Indianarjow ze serbskeju. Pišo za Nowy Casnik.
2) Jill-Francis Ketlicojc ze Žylowa, studentka pśirownujuceje literarneje wědomnosći a interdisciplinarnych pólskich studijow w Halle, basnikarka, pišo za Rozhlad, Nowy Casnik a Serbsku šulu. Wóna jo źěłała ako docentka, rozwucowała wótkubłarki we serbskej rěcy we intensiwnem kursu RCW.
