Na póžedanje dolnołužyskeje župy jo zgromaźina wobzam­knuła rezoluciju, źož pominaju wót bramborskego ministarstwa za kubłanje, až njedej wustajiś žedne minimalne licby wuknikow za serbsku a bilingualnu wucbu. Nowe wustajenje k serbskej wucbje dej wšykne formy serbskeje wucby mócowaś a skšuśiś a wukniki, kótarež we familiji ze serbskeju rěcu górjej rostu, wósebnje spěchowaś. Ministarstwo dej teke glědaś na dłujkolětne nazgónjenja praktikarjow w zakładnych a dalej wjeźecych šulach a na rezultaty ewaluacije serbskeje wucby, kaž teke na krajny plan k mócowanju serbskeje rěcy. Nowe wustajenje dej wšykne formy serbskeje wucby pólěpšyś a jim słužyś. Wónu rezoluciju budu pósłaś ministarstwoju.