W Picnju jo se iniciatiwa starała wó wuwitańsku skulpturu pśi tamnem wobchaźe do krejza (Kreisverkehr). Mjazy karpowymi skulpturami stoj „Willkommen in der Fischer- und Festungsstadt Peitz“. Picnjo lažy srjejź serbskich jsow a słuša serbskemu sedlenskemu rumoju. Toś jo nimska jadnorěcnosć źiwna. Za inciatiwu stoj to spěchowańske towaristwo „Picańska huta z.t.“ Jogo pśedsedaŕ Dietrich Kunkel jo Casnikoju gronił, až za skulpturu stoj priwatna inciatiwa, až jo wóna financěrowana pśez pósćenja. Togodla njejo wóna wěc města abo amta była. „Z tym njejo dwójorěcnosć juristiski notna. Šołta jo z nami wšak wó tom powědał. Ale dwójorěcne wugótowanje by droše było. A techniski by to śěžko było, te tofle by dejali dwójc tak wjelike byś.“