Iniciatiwowa kupka „Serbski Sejm“ jo medijam znate cyniła, až jo se 3. decembra zmakała z kandidatami „Rady Starostow“ w Njebelčicach. Cel zmakanja jo był, se mjazy sobu wótgłosowaś wó konstituěrowanju a pśichodnych nadawkach rady.

Na tom wjacoru su wobzamknuli, až „Rada Starostow“ dej byś njewótwisny gremium. Wóna njama konserwatiwne wótglědanje, ale rozmějo se skerjej ako „wótwardowaŕ“ pśichodnego ekologiskego, politiskego a socialnego procesa, kótaryž dej wjasć k załoženju „Serbskego Sejma“. „Rada Starostow“ dej wušej togo rukowaś za pówažnosć a transparentne zwopšawdnjenje iniciatiwy za Serbski Sejm. Dalej dej ta rada statkowaś ako „wólbna komisija“ pśi wólbach pśedparlamenta w lěśe 2017. Principielnje co ta rada pódpěraś zajmy serbskego zgromaźeństwa a ciwilneje towarišnosći, kótarejež nastupnosći deje se wujadnaś na bazisdemokratisku wizu a we wobjadnosći.