Z Města/Cottbus. Južo pětk wjacor, 2. oktobra, jo nanejmjenjej 80 luźi pó zalu chóśebuskego „mittendrin“ šwyrnuło, a to k polkam, mazurkam, walcykam a kołam kupki Serbska reja, a w běgu wjacora jo jich wjele wěcej wordowało. A teke drugi źeń, sobotu, 3. oktobra, jo se wót połdnja až do połnocy kněžyła w něgajšnem rejowańskem lokalu „Stadt Cottbus“ wjeliki nawal. Pśicyna za to jo był prědny wjeliki swěźeń Rejowańskego doma Łužyca pód motom „FOLK MUZIKA.LUDOWA REJA.SERBSKI SPIW.“ Nagromadu jo pśišło na wobyma dnjoma jadnab 150 luźi na woglěd, šacujo głowny organizator Gregor Kliem. Wósebnje se tomu wjaseli, až su pśišli wšykne starstwa. Z takim wjelikim wótgłosom pak teke wón njejo licył.