Z Dešna/Dissen. Pód titlom „Stary lud a fryšny duch – mólaŕske casowe drogowanje“ jo njeźelu wjednica Domowniskego muzeja Dešno Kathrin Šwjelina nowu wustajeńcu wótwóriła. We njej su wiźeś skice, kreslanki, acrylowe mólby, akwarele a druge wobraze wót nagromadu 13 wuměłcowkow a wuměłcow z Dolneje a Górneje Łužyce, ako su se wobźělili łoni na mólaŕskej źěłaŕnicce. Take pleinairy Spěchowański krejz za serbsku ludowu kulturu pšawidłownje organizěrujo na wšakich městnach we Łužycy, aby zmóžnił hobbyjowym a amaterskim wuměłcowkam a wuměłcam, se dalej wuwijaś pód fachowym nawjedowanim. Te w dešańskem muzeju wustajone twóŕby su nastali w ramiku takeje źěłaŕnicki pód nawjedowanim Maje Nagloweje, a to w a kołowokoło Dešna w septembrje 2025. Z tym jo tamny muzej, kótaryž jo wobrazam motiwy librował, tek se góźece wustajanišćo. We swójom wótwórjeńskem nagronje jo muzejowa wjednica južo spomnjeła, až źo wó pšašanje, co se stanjo, gaž wuměłce spušćiju swóje ateljeje. Wótegrono na to pšašanje jo namakał wobglědowaŕ wobrazow.