Ja som tužna, až Schadowanka lětosa wupadnjo, ale móžom to teke derje rozměś. Ja som była w DSG, w dkw, w Pisanem dwórnišću a w Gladhousu na Schadowance a som teke zwěsćiła, až zajm jo wóteběrał, lěcrownož program jo se pólěpšył. A to jo wjelika škóda. Na com móžo to zalažaś? Gaž ja wobglědujom serbske kulturne tšojenja, zwěsćijom, až na rejowański dom 2. do 3. oktobra jo pśišło 70 luźi, na Stary lud 300, na wótwórjenje wustajeńcow w Serbskem domje abo w Serbskem muzeju něźi 60 luźi, na drastwine zarědowanja 40 abo filmowe wjele wěcej a tak dalej. To jo chwalobnje a rědnje. Zwěsćijom pak, až ten publikum na takich zarědowanjach jo we wětšynje nimski. Z formatom Schadowanka nimske gósći pak njamógu wjele zachopiś a togodla teke njepśidu. Což pak tragiski jo, až Serby se njewobźěliju na Schadowance! Njeglědajucy na wukniki gymnaziuma ja se pšašam, źo su te Serbske duchy, źo jo tych 100 zajmcow kompaktnego kursa, źo su te ceptarje, kulturniki, młoźina a druge??? To pšašanje dejmy se stajiś. Ten format Schadowanki za mójim zdaśim njejo špatny, ale ta rěcna situacija jo taka, až taki format wěcej njefunkcioněrujo.