Z Budyšyna/Bautzen. „Źinsajšny cas wopśimjejo wjelike změny“ – z tymi słowami jo zachopił pśedsedaŕ Domowny Dawid Statnik wjacor 9. oktobra swójo nagrono na swěźeńskem zarědowanju ku góźbje pósćenja lětosnych Domowinskich mytow w Serbskem domje Budyšyn. Z tym jo wón měnił změny nastupajucy identitu a rěc. Ale dajo teke luźi, kótarež se za rěc a identitu zasajźuju, aby wóna se njezgubiła: „Su to luźe, kótarež wšykno gromadu źarže. Wóni su wót togo pśeznanjone, za cymž wóni stoje.“ Rownocasnje jo Statnik hyšći raz na te tśi wóźece gronidła Domowiny pokazał: zagronitosć, zwězanosć a wótwórjonosć. Tak stoj na pśikład zagronitosć za nadawk, kótaryž ma se k zdźaržanju rěcy a identity dopołniś.