Z Noweje Niwy/Neu Zauche. Někotare su mógali se zachadny kóńc tyźenja wjaseliś mócnje swěśecemu słyńcoju, někotare druge su musali z dešćom se spójźeś. Což nastupa Nowoniwańske, su wóni lětosa te glucne byli. Slědnu njeźelu su pśewjadli to tradicionelne rejtowanje wó kołac we tej jsy. Mjazy wšymi jsami w Dolnej Łužycy su wóni te jadne same, ako toś ten nałog woplěwaju.

K pśigótam jo słušało, až su wěnce za dobyśarjow wili. Kołace su z gromakowym zelim (Spargelkraut) wupyšnili. Nježli až su se wobźělniki njeźelu na kóńj šwignuli, jo se młoźina w cerkwi na namšy zmakała. Dogromady jo jich było 17 pórikow, a te su w póstajonem rěźe do cerkwje stupili a ju zasej spušćili. Pó namšy su źowća nowoniwańskeje młoźiny na dwórje cerkwje bantatu reju rejowali. Pótom su póriki śěgnuli do gósćeńca „Zum Oberspreewald“. How su źowća swóje šorce wuměnili: město šorce za namšuhyśe su se něnto swěźeńsku šorcu wobcynili. Teke crjeje su wuměnili: elegantne crjeje su musali copaś za turnaŕske crjeje.