Z Agen/Agen. Wót 20. julija až do 25. julija su se wucece z cełego swěta zmakali na pódpołdnju Francojskeje w małem městašku Agen na „The Agen Workshop“. Ten wobstoj južo z lěta 2013 a jo nastał z iniciatiwy wót Judith Logsdon-Dubois. Wóna jo kśěła swóju wucbu pólěpšyś a se z drugimi wucecymi wuměniś. W lěśe 2013 jo workshop z 15 wobźělnikami zachopił a pśez lěta dalej rosł. Małke gwězdki na toflickach z mjenim su pśi lětosnej konferency pokazali, kaž cesto su luźe se južo wobźělili. Wjele tych wucecych, kótarež jo se wobźěliło, jo pśišło z Ameriki, ale na pśikład teke ze Chinskeje, Belgiskeje abo Islandskeje. Mimo wucecych su teke někotare interesěrowane byli, kótarež su z celom pśišli, rěc nic jano nawuknuś, ale se pśiswójś. W tak pomjenjonych „Language Labs“ (rěcne labory) su mógali se pśiswójś bretonisku, engelsku, mandarinsku, francojsku, nimsku, rusojsku, nižozemsku a špańsku rěc. Wucece su mógali dopołdnja w rěcnych laborach hospitěrowaś abo se w jadnom kursu wobźěliś.