Z Dobrjoługa-Góstkowa/Doberlug-Kirchhain. Hyšći až do 20. septembra se wótmějo prědna Openart Lausitz Biennale, pśi kótarejž se pokažo wuměłstwo regionalnych a mjazynarodnych wuměłcow na wšakorakich městnach na pódpoł-dnju Bramborskeje. Jaden z tych jo ateljejowy dwór Werenzhain w Dobrjoługu-Góstkowje. Pětk, 31. julija, njejo se jano wótměł oficielny zachopjeńk cełeje Openart Lausitz Biennale, ale jo se teke wótwóriła wustajeńca na rědnem něgajšnem burskem dwórje a gósćeńcu, kenž mjaztym słužy ako ateljej a galerija. Wiźeś jo tam w zgromadnej wustajeńcy z wóterymi regionalnymi a mjazynarodnymi wuměłcami teke twóŕba serbskich młodych wuměłcow a wuměłcowkow – dolnoserbski krotkofilm „Pytaś a Namakaś“. Wernisaža jo była spódobny swěźeń pśi nejlěpšem wjedrje. Wobźělniki su dožywili nagrono, rejowańsku performance, live muziku a dobru jězu. Wjele luźi jo pśijěło, teke z Barlinja. Kritiski, wósebnje wót serbskego boka, jo se pak glědało na jadnu twóŕbu, w kótarejž wuměłcowka zwobraznijo swój zaśišć wót „nimskeje kultury“.