Z Bórkow/Burg. Bórkojska Domowinska młoźina jo pśepšosyła njeźelu na 133. łapanje kokota na łuku pśi droze Pla gólańskego groda w kupjelach Bórkowy. Dogromady 13 rejtarjow a rowno tak wjele źowćow w swěźeńskich drastwach jo było pódla. Pśi tom su Lutzketalske gerce je pśewóźili. Pó starej wašni stajaju we wjele jsach Dolneje Łužyce pó žnjach na pólach wupyšnjone wrota. Bórkojske wrota su pěś metrow wusoke a styri metry šyroke, wupyšnjone z dubowym listom a we srjejźi wisy njabogi kokot. Ten ma wósebne mócy, dej se wó to staraś, až budu w pśiducem lěśe zasej dobre žni. Lětosa jo Neumannojc familija kokota pósćiła a wó wrota stej se starałej amtěrowany superkral Dorian Urban a Moritz Schäfer. Moderěrowałej stej Louis Urban a Matti Ziege z bórkojskeje młoźiny, ako ma chylu 74 cłonkow. Wónej stej gósćam rozkładłej, až bórkojska młoźina rada woplěwa serbske nałogi, ako łapanje kokota, což znaju wót swójich starjejšych a starych starjejšych a su tak pśewzeli te tradicije. Ale teke zapust a jatšowny wogeń słušaju k woplěwanym nałogam.