Z Dešna/Dissen. Bramborska nakrajna partija jo kóńc tyźenja, na kótaremž rolnikaŕske zawody, dwórske lody a dalšne póbitowarje regionalnych produktow swóje wrota za gósći wótcyniju. Wobźělił jo se lětosa teke Dwór Sprjewinego ługa w Dešnje. Njeźelu su tam, njeglědajucy na wótměnjate wjedro, wjele woglědari wuwitaś směli. Te su byli teke pšosone, z dešańskim pcołkaŕskim towaristwom sobu swěśiś jogo 100. narodny źeń! Pśedsedaŕ Klaus Šery (Scherry) jo w swójom nagronje wuzwignuł wažnosć kubłańskego źěła, kenž wugbaju w šulach a źiśownjach. Wósebnje jo se wuźěkował Fredoju Kaiseroju, kenž južo wjele lět w towaristwje statkujo. Dalšny dłujkolětny cłonk towaristwa (wót wušej 40 lět) jo serbski pcołkaŕ Reinhard Šultka z Drjejc. Pśi wulach na Dwórje Sprjewinego ługa jo wón zajmcam to a druge wó pcołkaŕstwje rozkładł a jim teke dał woptaś mjod fryšnje z błonki. Teke do kašća, w kótaremž ze starych błonkow se rozběžujo wósk, jo pcołkaŕ dał póglěd. Jaden gólc jo jogo pšašał, lěc maju pśi tudskich wulach problemy z aziskim wjelickim šeršenjom.