Nowa doba z Veru Schmidt

Pó 35 lětach nawjedowanja jo Helmut Rotkähl wopśestał. Až jo chor mógał teke pótom dalej statkowaś, maju se źěkowaś nowej dirigentce. Wót 1997 nawjedujo Nimsko-serbski chor Žylow Vera Schmidt, diplomowa muzikowa pedagogowka a tencas wiceprezidentka Bramborskego chorowego zjadnośeństwa. Wóna jo měła južo w młodych lětach zwiski do Serbow. 1960 jo zachopiła źěłaś w Kulowje w Górnej Łužycy. Pśi tej góźbje jo se wopóznała ze serbskeju muziku a se za nju rozpaliła. Pózdźej jo pśeśěgnuła do Dolneje Łužyce, do Žylowa. A zasej jo měł chor gluku.

Vera Schmidt se dopomina: „1997 stand Wyli vor meiner Tür und ging nicht weg, bis ich gesagt habe, ich nehme den Chor.“

A to cyni wóna do źinsajšnego. A Žylowarje su glucne. Se wě, až nadalej woplěwaju teke serbske spiwy. A ceła jich paleta zazněwa na koncerśe ku wjelikemu jubilejoju chora. A teke to dejało se naspomnjeś. Žylojski chor jo měł lěta dłujko zwiski do Pólskeje, su byli samo na Mazurach. Wjele lět su sobu źěłali z chorom Szamotuły a tam wustupili na wejsnych swěźenjach. A pólske spiwarje su jim woglědali.