Z Pódstupima/Potsdam. Moto 26. Bramborskego festiwala noweje muziki („intersonanzen“) zachopjeńk junija w Pódstupimje jo zněło: „different traces“. A wěnowało jo se diwersiśe, indiwidualiśe a towarišnostnej zgromadnosći. Publikum jo dožywił zarědowanja w nejwšakorakšych formatach: koncerty – z wěcej ako 20 prapremjerami –, zukowe instalacije, performances a soundwalks na styri dnjach (4. do 7. junija) na wšakich městnach. Koncert 4. junija wjacor w muzeju Fluxus+ w Pódstupimje jo se zachopił ze spiwom Serba Jana Cyža na tekst „Rede-Wendungen“ Kita Lorenca w interpretaciji sopranistki Pia Davila a słowjeńskeje muzikaŕki Neža Torkar na akordeonje. Zajmnje a wósebnje jo reagěrował komponist na rěcne wobroty basnikarja.

Wobej muzikaŕce stej wěcej razow wuznamjenjonej interpretce, w klasiskem muzikaliskem žywjenju wustajonej a wažnej akterce na pólu moderneje muziki. Jeju wósebny program wopśimjejo temy natura a wobswět, identita a socialna pśisłušnosć, ale zaběratej se teke z rěcnym graśim a eksperimentom.