We wuzwólowanju jo Péter Magyar, pśedsedaŕ strony Tisza (Theiß), póbił ministaŕskego prezidenta Viktor Orbán a jogo pšawicaŕsko-populistisku stronu Fidesz. Jadnab 80 % do wuzwólowanja wopšawnjonych jo wótedało swóje głose – rekord w Hungorskej – a pśepódało mandat 141 wótpósłańcam strony Tisza, 52 kandidatam strony Fidesz a 6 zastupnikam pšawicaŕsko-ekstremistiskeje strony Mi Hazánk (Naša domownja). Strona Tisza jo dojśpiła dwě tśeśinje městnow w hungorskem parlamenśe. To jo wažna licba, glědajucy na to, až jo se Fidesz w zajźonych 16 lětach z wótpowědneju wětšynu nad krajom kněžyła a kazni a system pśeměniła a pśiměriła swójskej politiskej agenźe, mjazy drugim teke wólbny system. Pśichodny ministaŕski prezident Magyar móžo a co z teju wětšynu swójeje partaje wobšyrne reformy na dobro hungorskich luźi pśewjasć.