Nic jano serbske, ale teke ukrainske jatšowne jaja (foto) su byli k wobźiwowanju. Prědny raz jo teke žydojska rejowaŕska kupka program Małych wobogaśiła. Wšakorake kupki su w swěźeńskem stanje wustupili, mjazy nimi teke rejowaŕska kupka Barbuk.

Tak „małe“ wóni zewšym njejsu byli – toś te „Małe jatšy“. Teke lětosa jo zasej Dolnoserbska kulturna akademija/Dompro na njeźeli pó jatšach (to jo był 12. apryl) wjeliki familijowy swěźeń k Małym jatšam pśi wobłuku chóśebuskego Pisanego dwórnišća organizěrowała, źož su kulturelna wjelerakosć, respekta połna mjazsobnosć kulturow a rozwjaselenje w srjejźišću stojali. Tradicionelnje by był wóni kóńc tyźenja góźba, hyšći k dalšnym kmótšam pó jaja hyś. A teke na toś tych „Małych jatšach“ wót Dompro su mógali woglědarje, ako su w bogatej licbje pśichwatali, se z jatšownymi jajami zaběraś – je na pśikład pó tradicionelnej serbskej techniki wóskowanja wupyšniś abo z nimi walkowaś. Ale to dawno njejo to jadnučke było. Ducenty stojnišća su ze wšakorakimi regionalnymi produktami a póbitowanjami wabili.