Z Janšojc/Jänschwalde. Stwórtk, 2. apryla, smy jěli ze śěgom do Janšojc, źož jo Rosi Tšukowa juž na nas cakała. Wóna jo ako pśecej wjele wěcow spśigótowała, tak ako wjele kórtkow z nałogami Serbow. Naše źiśi su wšykne kórtki, mimo jańskego rejtowanja, póznali. Teke rědne tšojeńko z jatšownym wuchacom jo wóna źiśam pśedcytała. Ale źiśi su se nejžwěcej wjaselili na jatšowne nałogi, kenž jo Rosi kśěła jim pokazaś. Nejpjerwjej smy pó jatšownu wódu šli, ale nic jano ze zbórka do zbórka, ale z wjelikego wejsnego gata, źož jo to była jadnorazowa atmosfera. Rosi jo kanki z pócerańskim zbórkom napołniła a prědna kupka jo pón juž ceło śicho slědk šła. Druga kupka jo pón teke śicho z kankami šła, ale na kóńcu smy napšawdu někotare źiśi z plapotateju wódu měli. Se wě, až su se źiśi teke z wódu myli.