Z Drjowka/Drebkau. Serbske nałogi ako camprowanje, jatšowny wogeń a stajanje majskego boma se woplěwaju wšuźi w městnych źělach města Drjowk. Wšak: Gaby se wobźělił woglědaŕ wótwenka, njeby ten nejskerjej zawupytnuł, až jo to „serbski“ nałog był. Kak móžo se tomu zadoraś, až kultura a rěc źotej roztyla? A pśedewšym: Kak móžo se za to napśeśiwne wuwiśe staraś, až wobej se zasej zwěžotej? Wó tom jo diskutěrowało 20 zajmowanych a angažěrowanych luźi srjodu, 8. apryla, we fryšnje renowěrowanem Kawalěrskem domje pla Drjowkojskego groda. Pśepšosyła jo k tomu strategiska kupka projekta SROKA. Jo to ze zwězkowymi srědkami spěchowany projekt z cilom, wobšyrnu strategiju za rěcne planowanje za dolnoserbšćinu wuźěłaś. Pśi źěłaŕnickach (ta w Drjowku jo była mjaztym jich druga) deje se wšakorake wobłuki serbskego žywjenja wobswětliś. Lokalne aktery dostanu móžnosć, swóje nazgónjenja a pśedstajenja zapśimjeś, se do seśi zwězaś a wót nazgónjenjow drugich profitěrowaś.