W gósćeńcu Kaiser w Radomju su dlejšy cas pśedali jězdnicki za „Gustu“. A to z wokna, napšawo! 
17. stacija:
Stara Niwa/Bórklin,
Alt Zauche/Burglehn
Tšochu wětša ako ta we Wózwjerchu jo była ta stacija w Bórklinje. Oficialnje jo se cesto pisało, až se tomu dwórnišćoju groni „Alt Zauche“. Tegdy pśi załoženju Błośańskeje zeleznice pak běchu se rozsuźili nejpjerwjej za mě Burglehn. Akle w lěśe 1909 su to pśeměnili na Alt Zauche/Burglehn. Nejskerjej dla togo, až jo był Bórklin ten mjeńšy wejsny źěl wót Stareje Niwy.
Historikarje su měnjece, až jo Bórklin, něźi 10 kilomejtari pśed Lubinom, nastał na zachopjeńku 19. stolěśa ako „Vorwerk“ wót Stareje Niwy, ako bu akle 1818 prědny raz naspomnjety. Wjaska jo słušała k wósaźe Nowa Niwa, tak ako źinsa hyšći. W casu DDR bu how załožone ludowe kubło (Volksgut) z mjenim „Błota“ a how su kubłali a wótwardowali rogate zbóžo.
