Z Města/Cottbus. Pó prědnem adwenśe jo zasej było tak daloko, až jo Rěcny centrum WITAJ (RCW) pśiwitał wukniki tśeśego lětnika na gódowny projekt. Ta južo woblubowana tradicija za wuknikow serbskeje wucby jo se něnto lětniła k 27. razoju. Wót wałtory do pětka, 2. do 5. decembra, jo do Serbskego muzeja pśijěło jadnab 180 wuknikow. Wóni su dožywili program na tśich stacijach, kótaryž jo RCW pśewjadł we wuskej kooperaciji z muzejom a pódpěrowany wót Dolnoserbskeje kulturneje akademije. Wobźělili su se rědownje jadnasćo zakładnych šulow z Města, z Libanojc, Wětošowa, Tšupca, Bórkow, Picnja, Janšojc, Brjazyny a ze Žylowa.

Muzikowu staciju jo wobstarał Gerald Šejn. Z nim su źiśi nawuknuli serbske spiwy wó zymskem a gódownem casu. Dalšna stacija jo była wjeźenje pó stawnej wustajeńcy muzeja. Wjeźenje, inkluziwnje pisańskego workshopa w mjeńšych kupkach, jo pśewjadła Katharina Kliemowa.