Pip, pip, halo, Wy małe a wjelike – how pśizjawijo se waša mała Mimi. Lětosa som zasej wót źiśownje ku źiśowni byzała. Zgromadnje smy wósebnje zapśimujuce wěcy dožywili. Něnto, ako se lěto chyla ku kóńcuju, com wam wulicowaś, kak wjele wjasela jo to mě z wami gótowało.

Mója pśijaśelka Iben a ja, smej woglědałej k pěś źiśownjam a dwěma hortoma, a kuždy raz smej se wěcej wjaseliłej na te wjelicne wokognuśa pśi baslenju, grajkanju a eksperimentěrowanju. Ja njebudu wěcej zajtšna myška, ale gaž mě zajtša wubuźijośo, a ja z mójeje kisty wulězom a waše se błyšćece wócycka wiźim, pón wjaselim se kuždy raz na nowe póbitowanje we wašych kupkach.

Pónjeźele zalězomej do cerwjenego awta wót Iben a se póramej do Dešna. Do źiśownje „Wichtelland“. W mjasecnem rytmusu smějomej wót styri lět kurs serbskeje rěcy Franka woglědaś. Ako serbski powědajuca myška pokažom pśedwuknikam, až kuždy móžo serbski wuknuś a powědaś. Tak smej teke ned prěki pśez burski dwór byzałej a smy jen wuzgónili. Znajośo hyšći wšykne zwěrjeta na serbski? Krowa, swinja, kokošy a wjele wěcej.