Z Gołbina/Gulben. „Pópšawem som jano how dla jajowego likera“, tak jo zachopił Horst Adam, něgajšny šefredaktor Nowego Casnika žortnje swóje wuwjeźenja w zgromadnem wejsnem domje w Gołbinje. Šula za dolnoserbsku rěc a kulturu jo organizěrowała pśednosk ku temje „Gołbin w starych serbskich Casnikach“. Něźi 20 gósći z Gołbina, Cazowa, Rubyna, Gołkojc, Depska a Dešna běchu zajźonu srjodu tam pśichwatali, su se zajmowali za to, což jo se tegdy w starych Casnikach wó Gołbinje a susednych jsach pisało. Nježlic, až su se cytali prědne wurězki, jo Astrid Šramina wšych pśibytnych wuwitała a jo sama bejnje narska była, co by wóna nowego wó swójej jsy zgóniła. Horst Adam jo na zachopjeńku hyšći powšykne fakty wó Casniku wulicował. Na pśikład jo se groniło Nowemu Casnikoju hyšći do lěta 1905 Bramborski Casnik.