Teke to nas dopomnjejo na cas z Błośańskeju gustu. W lěśe 1903 běchu na rožku Barlinskeje drogi a Topołoweje aleje załožyli firmu „Glasgroßhandel und Schleiferei“ wót Richarda Rodiga (źinsa jo to firma „Glas und Spiegel“). Tam jo „gusta“ mimo jězdźiła, a to su namólowali na jadnej sćěnje.To něgajšne Błośańske dwórnišćo na Wilhelm-Külzowej droze wuglědajo hyšći tak ako we tom casu, ako jo ta „gusta“ jězdźiła. Jano wjelgin měrne tam jo. Něco małego a weto wjelgin wažnego – jo mimo togo wjelikego twarjenja pak hyšći wušej wóstało. Ga ten zbytk stareje wódoweje plumpy za wódu k piśeju! Fota: H. AdamPśi něntejšnem „Prjawoskem puśu“ stoj toś ta tofla ze žednymi informacijami a bildkami wó něgajšnem dwórnišću.

Lětosa jo 55 lět, až jo „Błośańska zeleznica“, kótaruž njejsu lubowali a cesćili jano luźe tudy w stronach mjazy Chóśebuzom a Lubinom, ale teke turisty a gósći w Błotach, bóžko wumrěła. Něnt jo wóna wudychnuła, naša luba stara Błośańska zeleznica. Wóna jo słušała k Błotam skóro rowno tak ako rěki a tšugi, wólše a te stare ze słomu kšyte domy – tak jo tegdy Wylem Bjero w Casniku pisał. Kradu 3.