Teke za ewangelskego kśesćijana se wupłaśijo, glědaś na Vatikan. Zamrěty bamž Franciskus jo napominał w swójom prědnem pósołskem pismje „Evangelii gaudium“ (wjasele na ewangeliumje) z lěta 2013 we wochłoźecej a žywjenju bliskej wašni, spušćiś „spódobny pastoralny kriterium ‚To jo se pśecej tak cyniło‘“. Jo pśepšosył wšyknych, dowažne a kreatiwne byś za kśesćijaństwo. Pśi tom jo jasne, až jo wjelgin śěžko, w katolskej cerkwi něco změniś. To pak płaśi teke za ewangelsku cerkwju. Wóstanjo wšykno pśi starem?

Njejo nic nowego, gaž se groni, až situacija cerkwjow jo dramatiska. Pśecej cesćej wiźimy hektiske pśetwarjenja wósadow a institucijow, kótarež deje zdźaržaś tradicionelne struktury. Kužde lěto pak cytamy nowe rekordowe licby wustupow. Teke studium na faraŕstwo njejo wěcej atraktiwny – licba ewangelskich absolwentow w Nimskej jo spadnuła wót lěta 2015 do 2023 wót 323 na 174. Pla katolskich jo to było jano 25. Něnto se mysle, až pśechod na system z bachelorom/masterom a studium mimo hebrejšćiny a grichišćiny dejtej pomagaś.