Z Popojc/Papitz. Skóńcnje jo było tak daloko – ten źeń, na kótaremž su kśěli togo głownego krala tych kralow kronowaś. Sobotu, 27. septembra, su se kokotowe krale ze 22 jsow Dolneje Łužyce zmakali w Popojcach w gmejnje Gołkojce, aby wójowali wó cesny titel „superkral“. A tak ako pśecej pśi takich góźbach su se tam zgromaźili we wjelikej licbje luźe – wósebnje młodše –, ako dłujko wěcej njejsu se wiźeli. Toś jo było tam teke wjelike wjasele pśi zasejwiźenju mjazy tymi pśiglědarjami.

Tak, ako gronjone, tenraz su byli wšykne pśi južo 24. Superkokośe wutšobnje witane w Popojcach. A to łapanje jo było napšawdu wjelike wójowanje! Wšykne rejtarje – jich jo było dogromady 22 – su se wjelgin napinali. Teke Phillip Kissel z Popojc, ako běšo se łoni wudobył titel „superkral“. Pśisamem by se jomu raźiło, hyšći raz holiś ten titel do swójeje jsy.