Ze Smogorjowa/Schmogrow. To jo śi był rědny a pisany swěźeń! Muškojc a druge familije, ako bydle pśi něgajšnem dwórnišću „Błośańskeje gusty“, běchu slědnu njeźelu kazali na swójski žnjowny swěźeń, to se wě, z kokotom. Južo 24. raz su to cynili, a lěcrownož njeběchu do togo niźi zjawnje a mócnje za to wabili, jo se tam ten źeń wótpołdnja až do wjacora pśi nejlěpšem wjedrje pśinamakało wjele, wjele narskich luźi z młogich jsow z cełeje wokoliny. Wjele staršych, ale teke młode luźe a źiśi w radnej licbje. Wušej towzynt gósći a pśiglědari jo jich było, wěcej ako łoni, ako jo nam groniła Sandra Mušcyna.