Z Brjazkow/Brieske. Což jo se zachopiło ako jaden w Bretani (Francojskej) iniciěrowany mjazynarodny projekt, to jo w Dolnej Łužycy wunjasło płody, kenž su se teke na 13. Łužyskem festiwalu lyriki (wót 5. do 7. septembra) prezentěrowali. Pód titelom „Lyrikzin 11: Domownja – Heimat – sorbische & deutsche Lyrik“ su wujšli serbske a nimske basni z pjera 17-lětnych wuknicow Dolnoserbskego gymnaziuma Lucie Loichenojc, Lara Knackmuß a Suzanna Szikorski. Nastali su te teksty w pisańskej źěłaŕni pód nawjedowanim basnikaŕki Źilka. Pśi premjerje Lyrikzina sobotu w złykomorojskem zagrodowem měsće Marga w Brjazkach/Brieske jo bóžko mógała jano Źilka pódla byś a jo za publikum něco z togo cytała.