Z Hochoze/Drachhausen. Łoni jo to było k žnjownemu swěźenjoju w Hochozy bejnje góruce. Se zda, až su se Hochozarje dla togo pitśku pśewjele wobśěžkowali. Snaź jo wjedro lětosa, dnja 23. awgusta, dla togo se pokazało tak zymne a kipate. Wobźělnikow a pśiglědarjow jo cesćej huśawka pśechwatała. Z tym jo bóžko teke serbskorěcne nagrono młoźinskego šefa Lorenza Krauße do wódy padnuło. Cedlik z tekstom jo pśemokšy wordował.

Wót cerkwje jo se wupórał śěg z 14 rejtarjami a 27 žeńskimi a źowćami do směra športnišća, źož stej swěśenišćo a městno za łapanje kokota byłej. Lětosa njejo jano młoźina sobu rejtowała, ale teke wóženjone. Dla togo stej lětosa wisałej dwa kokota na forśe! W casu, ako su se rejtarje pśigótowali, zarejtowali, su pódla cery pśewjadli łapanje kokota za źiśi.